ಬೇಸಿಗೆ ರಜೆ ಬಂತೆಂದರೆ ಮಕ್ಕಳಿಗೆ ಬರೀ ಆಟ, ಮೊಬೈಲ್ ಅಂದುಕೊಂಡಿದ್ದೀರಾ? ಖಂಡಿತ ಇಲ್ಲ! ಈ ಬಾರಿ ನಿಮ್ಮ ಮಕ್ಕಳ ರಜೆಯನ್ನು ಜ್ಞಾನಮಯವಾಗಿಸಲು ಮತ್ತು ಅವರಲ್ಲಿ ಸನಾತನ ಧರ್ಮದ ಸದ್ಗುಣಗಳನ್ನು ಬಿತ್ತಲು ದಕ್ಷಿಣಾಮ್ನಾಯ ಶ್ರೀ ಶಾರದಾ ಪೀಠ, ಶೃಂಗೇರಿ ಮಠವು ಒಂದು ಅಪೂರ್ವ ಅವಕಾಶವನ್ನು ತಂದಿದೆ. ಶೃಂಗೇರಿ ಮಠದ ಶೈಕ್ಷಣಿಕ ವಿಭಾಗವಾದ ‘ಬಾಲ ಭಾರತಿ’ ವತಿಯಿಂದ ರಾಜ್ಯಮಟ್ಟದ ‘ಶ್ರೀಮದ್ ರಾಮಾಯಣ ಪರೀಕ್ಷೆ- 2026’ ಅನ್ನು ಆಯೋಜಿಸಲಾಗಿದೆ. ಇದು ಕೇವಲ ಪರೀಕ್ಷೆಯಲ್ಲ, ರಾಮನ ಆದರ್ಶಗಳನ್ನು ಇಂದಿನ ಪೀಳಿಗೆಗೆ ತಲುಪಿಸುವ ಒಂದು ಪುಣ್ಯ ಕಾರ್ಯ. ಈ ಸ್ಪರ್ಧೆಯಲ್ಲಿ ಭಾಗವಹಿಸುವ ಮೂಲಕ ನಿಮ್ಮ ಮಕ್ಕಳು ಕೇವಲ ಜ್ಞಾನವನ್ನಷ್ಟೇ ಅಲ್ಲ, ಆಕರ್ಷಕ ನಗದು ಬಹುಮಾನಗಳನ್ನೂ ಗೆಲ್ಲಬಹುದು.
ಏನಿದು ರಾಮಾಯಣ ಪರೀಕ್ಷೆ?
ಮಕ್ಕಳ ಬೌದ್ಧಿಕ ವಿಕಸನಕ್ಕೆ ಪೂರಕವಾಗಿ ಮತ್ತು ಸನಾತನ ಧರ್ಮದ ಮೌಲ್ಯಗಳನ್ನು ಬಾಲ್ಯದಲ್ಲೇ ಅಳವಡಿಸಲು ಶೃಂಗೇರಿ ಮಠವು ಈ ಸ್ಪರ್ಧಾತ್ಮಕ ಪರೀಕ್ಷೆಯನ್ನು ಆಯೋಜಿಸಿದೆ. ಶ್ರೀಮದ್ ರಾಮಾಯಣದ ಸಾರವನ್ನು ಮಕ್ಕಳು ಅರ್ಥಮಾಡಿಕೊಳ್ಳುವಂತೆ ಪ್ರೇರೇಪಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ.
ಯಾರೆಲ್ಲಾ ಭಾಗವಹಿಸಬಹುದು?
ವಿದ್ಯಾರ್ಥಿಗಳ ವಯಸ್ಸು ಮತ್ತು ತರಗತಿಯ ಆಧಾರದ ಮೇಲೆ ಪರೀಕ್ಷೆಯನ್ನು ಎರಡು ಹಂತಗಳಲ್ಲಿ (Levels) ನಡೆಸಲಾಗುತ್ತದೆ:
- ಹಂತ 1 (Level 1): ಪ್ರಸ್ತುತ 4, 5 ಮತ್ತು 6ನೇ ತರಗತಿಯಲ್ಲಿ ಓದುತ್ತಿರುವ ವಿದ್ಯಾರ್ಥಿಗಳು.
- ಹಂತ 2 (Level 2): ಪ್ರಸ್ತುತ 7, 8, 9 ಮತ್ತು 10ನೇ ತರಗತಿಯಲ್ಲಿ ಓದುತ್ತಿರುವ ವಿದ್ಯಾರ್ಥಿಗಳು.
ಗೆಲ್ಲಬಹುದಾದ ಬಹುಮಾನಗಳ ವಿವರ: ಸ್ಪರ್ಧೆಯಲ್ಲಿ ವಿಜೇತರಾದ ಮಕ್ಕಳಿಗೆ ಬೃಹತ್ ನಗದು ಬಹುಮಾನ ಮತ್ತು ವಿಶೇಷ ಅವಕಾಶಗಳು ಕಾಯುತ್ತಿವೆ:
(ಗಮನಿಸಿ: ನಗದು ಬಹುಮಾನಗಳು ಹಂತ 2ರ ವಿದ್ಯಾರ್ಥಿಗಳಿಗೆ ಮಾತ್ರ)
- ಪ್ರಥಮ ಬಹುಮಾನ: ಬರೋಬ್ಬರಿ ₹50,000 ನಗದು
- ದ್ವಿತೀಯ ಬಹುಮಾನ: ₹40,000 ನಗದು.
- ತೃತೀಯ ಬಹುಮಾನ: ₹30,000 ನಗದು.
- ವಿಶೇಷ ಬಹುಮಾನ: ₹10,000 ನಗದು.
ಹೆಚ್ಚುವರಿ ಆಕರ್ಷಣೆ: ಅಗ್ರ 8 ವಿದ್ಯಾರ್ಥಿಗಳಿಗೆ ನಗದು ಬಹುಮಾನದೊಂದಿಗೆ ಶೃಂಗೇರಿ ಕ್ಷೇತ್ರಕ್ಕೆ ಉಚಿತ ಪ್ರಾಯೋಜಿತ ಪ್ರವಾಸ ಮಾಡುವ ವಿಶೇಷ ಅವಕಾಶ ಲಭ್ಯವಿದೆ. (ಹಂತ-1ರ ವಿಜೇತರಿಗೆ ವಿಶೇಷ ಬಹುಮಾನಗಳು, ಪ್ರಮಾಣಪತ್ರಗಳು ಮತ್ತು ಪದಕಗಳನ್ನು ನೀಡಲಾಗುತ್ತದೆ).
