ಭಾರತದಲ್ಲಿ ‘ಟಾಟಾ’ ಎಂದರೆ ಕೇವಲ ಒಂದು ಕಂಪನಿಯಲ್ಲ, ಅದೊಂದು ಕೋಟ್ಯಂತರ ಜನರ ನಂಬಿಕೆ. ಬಡತನ ಅಥವಾ ಆರ್ಥಿಕ ಮುಗ್ಗಟ್ಟಿನ ಕಾರಣಕ್ಕೆ ಯಾವುದೇ ಪ್ರತಿಭಾವಂತ ವಿದ್ಯಾರ್ಥಿಯ ಓದು ಅರ್ಧಕ್ಕೆ ನಿಲ್ಲಬಾರದು ಎಂಬ ಉದಾತ್ತ ಉದ್ದೇಶದಿಂದ ಟಾಟಾ ಕ್ಯಾಪಿಟಲ್ (Tata Capital) ಈಗ ಹೊಸದೊಂದು ಭರವಸೆಯ ಬೆಳಕು ಹೊತ್ತು ತಂದಿದೆ.
ತನ್ನ ‘ಪಂಖ್’ (Pankh) ಯೋಜನೆಯಡಿ ವಿದ್ಯಾರ್ಥಿಗಳಿಗೆ ಬರೋಬ್ಬರಿ ₹1,00,000 ವರೆಗೆ ಆರ್ಥಿಕ ನೆರವು ನೀಡಲು ಮುಂದಾಗಿದೆ. ನೀವು 2025-26ನೇ ಸಾಲಿನಲ್ಲಿ ಕಲಿಯುತ್ತಿರುವ ವಿದ್ಯಾರ್ಥಿಯಾಗಿದ್ದರೆ, ಈ ಸುವರ್ಣಾವಕಾಶ ನಿಮ್ಮದಾಗಿಸಿಕೊಳ್ಳಬಹುದು. ಈ ಸ್ಕಾಲರ್‌ಶಿಪ್‌ಗೆ ಅರ್ಜಿ ಸಲ್ಲಿಸುವುದು ಹೇಗೆ? ಅರ್ಹತೆಗಳೇನು? ಎಂಬ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಯಾರಿಗೆಲ್ಲಾ ಸಿಗಲಿದೆ ಈ ಸ್ಕಾಲರ್‌ಶಿಪ್?
ಟಾಟಾ ಸಂಸ್ಥೆಯು ಈ ಯೋಜನೆಯನ್ನು ಕೇವಲ ಒಂದು ವರ್ಗಕ್ಕೆ ಸೀಮಿತಗೊಳಿಸದೆ, ಶಾಲಾ ಹಂತದಿಂದ ವೃತ್ತಿಪರ ಕೋರ್ಸ್‌ಗಳವರೆಗೆ ವಿಸ್ತರಿಸಿದೆ:
- ಶಾಲಾ ಮಕ್ಕಳಿಗೆ: ಸದ್ಯ 6ನೇ ತರಗತಿಯಿಂದ 12ನೇ ತರಗತಿ (ಪಿಯುಸಿ) ಓದುತ್ತಿರುವವರು.
- ಪದವಿ ವಿದ್ಯಾರ್ಥಿಗಳಿಗೆ: ಬಿ.ಎ, ಬಿ.ಎಸ್ಸಿ, ಬಿ.ಕಾಂ, ಬಿಬಿಎ ನಂತಹ ಸಾಮಾನ್ಯ ಪದವಿ ಮಾಡುತ್ತಿರುವವರು.
- ವೃತ್ತಿಪರ ಶಿಕ್ಷಣ: ಇಂಜಿನಿಯರಿಂಗ್ (B.E/B.Tech), ವೈದ್ಯಕೀಯ (MBBS), ಕಾನೂನು (Law) ಅಥವಾ ನರ್ಸಿಂಗ್ ಓದುತ್ತಿರುವವರು.
- ಡಿಪ್ಲೋಮಾ: ಸರ್ಕಾರಿ ಮಾನ್ಯತೆ ಪಡೆದ ಯಾವುದೇ ಡಿಪ್ಲೋಮಾ ವಿದ್ಯಾರ್ಥಿಗಳು ಅರ್ಜಿ ಸಲ್ಲಿಸಬಹುದು.
ಮುಖ್ಯ ಅರ್ಹತೆ: ವಿದ್ಯಾರ್ಥಿಯು ತನ್ನ ಹಿಂದಿನ ತರಗತಿಯಲ್ಲಿ ಕನಿಷ್ಠ 60% ಕ್ಕಿಂತ ಹೆಚ್ಚು ಅಂಕ ಗಳಿಸಿರಬೇಕು ಮತ್ತು ಕುಟುಂಬದ ವಾರ್ಷಿಕ ಆದಾಯ ₹4,00,000 ಮೀರಿರಬಾರದು.
ನಿಮಗೆ ಎಷ್ಟು ಹಣ ಸಿಗುತ್ತದೆ?
ವಿದ್ಯಾರ್ಥಿ ಓದುತ್ತಿರುವ ತರಗತಿಯ ಆಧಾರದ ಮೇಲೆ ಸ್ಕಾಲರ್‌ಶಿಪ್ ಮೊತ್ತವನ್ನು ನಿಗದಿಪಡಿಸಲಾಗಿದೆ. ನಿಮ್ಮ ಕಾಲೇಜು ಫೀಸಿನ ಸುಮಾರು 80% ರಷ್ಟು ಹೊರೆಯನ್ನು ಈ ಯೋಜನೆ ಭರಿಸಲಿದೆ.
| ವಿದ್ಯಾರ್ಥಿಯ ಹಂತ | ಸಿಗುವ ಗರಿಷ್ಠ ಸ್ಕಾಲರ್‌ಶಿಪ್ ಮೊತ್ತ |
| 6 ರಿಂದ 10ನೇ ತರಗತಿ | ₹10,000 ವರೆಗೆ |
| 11 ಮತ್ತು 12ನೇ (PUC) ತರಗತಿ | ₹12,000 ವರೆಗೆ |
| ಡಿಪ್ಲೋಮಾ / ಸಾಮಾನ್ಯ ಪದವಿ | ₹15,000 ದಿಂದ ₹20,000 ವರೆಗೆ |
| ವೃತ್ತಿಪರ ಪದವಿ (BE/MBBS/Law) | ₹30,000 ದಿಂದ ₹1,00,000 ವರೆಗೆ |
ಆಯ್ಕೆ ಪ್ರಕ್ರಿಯೆ ಹೇಗಿರುತ್ತದೆ?
ಅರ್ಜಿ ಸಲ್ಲಿಸಿದ ತಕ್ಷಣ ಹಣ ಕೈ ಸೇರುವುದಿಲ್ಲ. ಟಾಟಾ ಸಂಸ್ಥೆಯು ಪಾರದರ್ಶಕವಾಗಿ ಈ ಕೆಳಗಿನ ಹಂತಗಳಲ್ಲಿ ವಿದ್ಯಾರ್ಥಿಗಳನ್ನು ಆಯ್ಕೆ ಮಾಡುತ್ತದೆ:
- ದಾಖಲೆ ಪರಿಶೀಲನೆ: ನೀವು ನೀಡಿದ ಅಂಕಪಟ್ಟಿ ಮತ್ತು ಆದಾಯ ಪ್ರಮಾಣಪತ್ರಗಳನ್ನು ಮೊದಲು ತಪಾಸಣೆ ಮಾಡಲಾಗುತ್ತದೆ.
- ಶಾರ್ಟ್‌ಲಿಸ್ಟ್: ಅತಿ ಹೆಚ್ಚು ಆರ್ಥಿಕ ನೆರವು ಬೇಕಾದ ಪ್ರತಿಭಾವಂತ ಮಕ್ಕಳ ಪಟ್ಟಿ ಸಿದ್ಧವಾಗುತ್ತದೆ.
- ಫೋನ್ ಸಂದರ್ಶನ (Telephonic Interview): ಇದು ಬಹಳ ಮುಖ್ಯ. ಆಯ್ಕೆಯಾದ ವಿದ್ಯಾರ್ಥಿಗಳಿಗೆ ಸಂಸ್ಥೆಯಿಂದ ಫೋನ್ ಕರೆ ಬರುತ್ತದೆ. “ನಿಮ್ಮ ಮುಂದಿನ ಗುರಿ ಏನು? ಈ ಹಣ ನಿಮಗೆ ಹೇಗೆ ಸಹಾಯ ಮಾಡುತ್ತದೆ?” ಎಂಬ ಸಾಮಾನ್ಯ ಪ್ರಶ್ನೆಗಳನ್ನು ಕೇಳಲಾಗುತ್ತದೆ. ಇದಕ್ಕೆ ಧೈರ್ಯವಾಗಿ ಉತ್ತರಿಸಿದರೆ ಸಾಕು.
ಬೇಕಾಗುವ ದಾಖಲೆಗಳು
ಅರ್ಜಿ ಸಲ್ಲಿಸುವ ಮುನ್ನ ಈ ಕೆಳಗಿನ ದಾಖಲೆಗಳ ಸ್ಕ್ಯಾನ್ ಕಾಪಿ ರೆಡಿ ಇಟ್ಟುಕೊಳ್ಳಿ:
- ವಿದ್ಯಾರ್ಥಿಯ ಆಧಾರ್ ಕಾರ್ಡ್.
- ಹಿಂದಿನ ವರ್ಷದ ಫೈನಲ್ ಅಂಕಪಟ್ಟಿ (Marks Card).
- ಪ್ರಸ್ತುತ ಸಾಲಿನ ಕಾಲೇಜು ಫೀಸ್ ರಶೀದಿ ಅಥವಾ ಬೋನಫೈಡ್ ಸರ್ಟಿಫಿಕೇಟ್.
- ತಹಶೀಲ್ದಾರ್ ಕಚೇರಿಯಿಂದ ಪಡೆದ ಆದಾಯ ಪ್ರಮಾಣ ಪತ್ರ.
- ವಿದ್ಯಾರ್ಥಿಯ ಹೆಸರಿನ ಬ್ಯಾಂಕ್ ಪಾಸ್‌ಬುಕ್ ಜೆರಾಕ್ಸ್.
- ಇತ್ತೀಚಿನ ಪಾಸ್‌ಪೋರ್ಟ್ ಸೈಜ್ ಫೋಟೋ.
ಅರ್ಜಿ ಸಲ್ಲಿಸಲು ಕೊನೆಯ ದಿನಾಂಕ ಯಾವಾಗ?
ಟಾಟಾ ಕ್ಯಾಪಿಟಲ್ ಪಂಖ್ ಸ್ಕಾಲರ್‌ಶಿಪ್‌ಗೆ ಅರ್ಜಿ ಸಲ್ಲಿಸಲು 2026ರ ಫೆಬ್ರವರಿ 15 ಕೊನೆಯ ದಿನವಾಗಿದೆ. ಸಮಯ ಬಹಳ ಕಡಿಮೆ ಇರುವುದರಿಂದ ಈಗಲೇ ದಾಖಲೆಗಳನ್ನು ಸಿದ್ಧಪಡಿಸಿಕೊಳ್ಳಿ.
ಎಲ್ಲಿ ಅರ್ಜಿ ಸಲ್ಲಿಸಬೇಕು?
ಈ ಸ್ಕಾಲರ್‌ಶಿಪ್ ಅನ್ನು ‘Buddy4Study’ ಪೋರ್ಟಲ್ ನಿರ್ವಹಿಸುತ್ತಿದೆ. ಆಸಕ್ತರು www.buddy4study.com ವೆಬ್‌ಸೈಟ್‌ಗೆ ಭೇಟಿ ನೀಡಿ ಅರ್ಜಿ ಸಲ್ಲಿಸಬಹುದು.
ಗಮನಿಸಿ: ಈ ಸ್ಕಾಲರ್‌ಶಿಪ್‌ಗೆ ಅರ್ಜಿ ಸಲ್ಲಿಸಲು ಯಾವುದೇ ಶುಲ್ಕವಿರುವುದಿಲ್ಲ. ಯಾರಾದರೂ ಹಣ ಕೇಳಿದರೆ ನಂಬಬೇಡಿ.
